المقادير : *
2 – دجاجات " ما يكونوش غلاض "
4 – ثومات محكوكين
- حفنة ديال المعدنوس مشلضة
فرماج حمر محكوك
حك كبير ديال الشمبينو "الفطر"
- الملح + لبزار+ الملون+ لاموطارد+2 ضامات ديال البنة أوغير وحدة "حسب الذوق"
- معالقة كبيرة ديال الزبدة
الطريقة : *
انقي ادجاج و نغسلو مزيان بالما و الملح و الخل
فطبسيل كبير ندير الثومات محكوكين+ قبطة ديال معدنوس+ الملح + لبزار
+الملون + معلقة كبيرة ديال لاموطارد+معلقة كبيرة ديال الزبدة+ ضامة ديال البنة
نخلط كل شي مزيان,خصني نحصل على خليط بحال "بوماضا"
ندهن دجاج بهاد الخليط مزيان من برا و من الداخل ديالها حتى يتشرب دجاج الخليط,نسخن الفران مزيان و ندخل دجاج لفران يطيب و يتحمر و مرة مرة نسقيه بالعصير اللي كيهبط منو,نرمي حك ديال الشمبينيو فوق لاصوص ديال دجاج و نخليه يتحمر شوي
منين يطيب دجاج ندردر فوق منو لفروماج خمر محكوك و نخليه يدوب فوق منو و نقدمو بالصحة و العافية
يمكن لينا نقدمو هاد دجاج محمر مع الروز مسلوق او بطاطا مقلية
دجاج محمر بزعفران الحر و بعصير الحامض
المقادير : *
2 – دجاجات " ما يكونوش غلاض "
5 – ثومات محكوكين
قبطة ديال المعدنوس مشلضة
2 – حامضات " لونهم خضر "
- الملح + لبزار+ الزعفران الحر+ الخرقوم
- الزيت العادية
الطريقة : *
انقي ادجاج و نغسلو مزيان بالما و الملح و الخل
فطبسيل كبير ندير الثومات محكوكين+ قبطة ديال معدنوس+ الملح + لبزار
+ زعفران الحر + شوية خرقوم+ الزيت+ 1 حامضة معصرة
نخلط كل شي مزيان,خصني نحصل على خليط بحال "بوماضا"
ندهن دجاج بهاد الخليط مزيان من برا و من الداخل ديالها حتى يتشرب دجاج الخليط,نسخن الفران مزيان و ندخل دجاج لفران يطيب و يتحمر
منين يطيب و يتحمر دجاج نسقيه بعصير الحامضة الثانية و نقدمو دجاج بالصحة و العافية
دجاج مشرمل
ا لمقادير : *
- دجاجة "2 كيلو"
5 – ثومات محكوكين
2 – بصلات مشلضين
حفنة ديال القزبور و المعدنوس مشلضة
1 – حامضة معصرة
1 – حامضة مرقدة + القلب ديالها "مشلض"
حفنة ديال الزيتون لحمر
- الملح + لبزار+ اسكنجبير+الملون + الكمون+ الفلفلة حمرة+شوية دلهريسة أو شوية سودانية
- الزيت العادية + زيت الزيتون
الطريقة : *
انقي ادجاج و نغسلو مزيان بالما و الملح و الخل
نقطع دجاجة طراف
فطبسيل كبير ندير طراف ديال دجاج +الثومات محكوكين+ اربيع+ الملح + لبزار
+ الملون+ شوية دلهريسة أو السودانية+ الزيت+الكمون+الفلفلة حمرة+ نص عصير ديال الحامض
نخلط كل شي مزيان,و نشرمل دجاجة مزيان و نخلي الشرمولة تدخل فيها لمدة ربع ساعة
فطنجرة ندير طراف ديال دجاج لمشرمل + البصلة مشلضة+الزيت و نحمر و نشحر كل شي , ندير 2 كيسان ديال الما + اسكنجبير+ الملح+ الملون و نغصي الطنجرة و نخلي دجاج يطيب,مرة مرة نحرك دجاج و نقلبو ,نزيد الما إلى كان و خاص,منين يقرب يطيب دجاج ندير شوية ديال الفلفلة حمرة+الكمون+الحامض مرقد+القلب ديالو مشلض+الزيتون لحمر,منين يطيب دجاج,نعري عليه و نخليه يتقلا و نسقيه بنص ديال الحامضة معصرة .
الثلاثاء سبتمبر 09, 2008 2:20 pm
